کراچی (جسارت نیوز):ربانی کلب نے بلدیہ چیمپئنز ٹرافی ہاکی لیگ سیزن2 کا ٹائٹل جیت لیا۔بلدیہ چیمپئنز ٹرافی ہاکی لیگ سیزن 2 کا فائنل ربانی ایچ سی اور یوتھ ایچ سی کے درمیان کھیلا گیا۔ ربانی کلب نے ایونٹ کی فیورٹ یوتھ ہاکی کلب کو 5-7 گول سے شکست دیدی، بلدیہ ہاکی کلب کے اشتراک سے کراچی ہاکی ایسوسی ایشن کے زیر انتظام کے ایچ اے ا سپورٹس کمپلیکس گلشن اقبال میں کھیلے گئے فائنل کے پہلے ہاف کے اختتام پر ربانی ہاکی کلب کو 0-3 کی برتری حاصل تھی تاہم دوسرے ہاف میں یوتھ ایچ سی نے شاندار کم بیک کیا، یوتھ ایچ سی کے فارورڈ کے جارحانہ کھیل کے باعث ربانی ایچ سی اپنی برتری برقرار نہ رکھ سکی جس کے باعث مقررہ وقت میں اسکور 3-3 گول سے برابر رہا۔ ربانی ایچ سی کے راجا مرتضی چوتھے، ارباز ایاز نے8ویں اور نعمان خان نے `14ویں منٹ میں گول کئے جبکہ یوتھ ہاکی کلب کے سعد ظہیر، فہیم خان اور حسن علی نے دوسرے ہاف کے 18ویں، 30ویں اور 59 ویں منٹ میں گیند جال میں پھینک کر مقابلہ برابر کیا۔ پینلٹی شوٹ آئوٹ کے نتیجے فاتح ٹیم کے محمد عدیل، نوشاد علی، نعمان خان اور ارباز ایاز جبکہ یوتھ ایچ سی کے شاہ زیب ارباب اور سعد ظہیر نے گول کئے، یوتھ ایچ سی کے عمر حسن اور علی عباس فاتح ٹیم کے وجاہت حسین اور گلبرگ ہاکی کلب کے محمد ابرہیم ایمرجنگ پلیئرز آف دی ٹورنامنٹ کا ایوارڈز حاصل کرنے میں کامیاب رہے، بہترین کھیل کے باعث ربانی ایچ سی کے ارباز ایاز میچ کے بہترین کھلاڑی، یوتھ کلب کے حسن علی ٹورنامنٹ کے بہترین کھلاڑی جبکہ فاتح ٹیم کے ہی منیر محمد بہترین گول کیپر قرار دیئے گئے، یوتھ ہاکی کلب کے سعد ظہیر ٹورنامنٹ کے ٹاپ اسکورر رہے۔ ایونٹ کے اختتام پر مہمان خاص ایڈیشنل کمشنر ایف بی آر (آر ٹی ڈی)کراچی محمد علی جعفری نے کھلاڑیوں میں انعامات تقسیم کیے۔
