کراچی ( اسٹاف رپورٹر)کراچی ہاکی ایسوسی ایشن کے زیر انتظام بلدیہ چیمپئنز ٹرافی سیزن ٹو کا آغاز ہوگیا، چیمپئنز ٹرافی میں یوتھ ایچ سی، بلدیہ ایچ سی، گلبرگ ایچ سی، ربانی ایچ سی اور ون پاکستان ہاکی کلب کی ٹیمیں ایکشن میں نظر آئیں گی، ایونٹ کا فائنل31 مارچ کو شیڈول ہے۔بلدیہ ہاکی کلب کے اشتراک سے کے ایچ اے اسپورٹس کمپلیکس میں گلبرگ ہاکی کلب اور بلدیہ ہاکی کلب کے درمیان کھیلے گئے افتتاحی میچ کا افتتاح قومی ہاکی ٹیم کے سابق کپتان اولمپیئن حنیف خان نے کیا۔ مقررہ وقت میں دونوں ٹیموں کے درمیان کھیلا گیا میچ۔ تین تین گول سے برابر رہا۔ بلدیہ ایچ سی کی جانب سے بلاول نے دو جبکہ ولید نے ایک گول، گلبرگ ایچ سی کی جانب سے ماذ آفریدی نے دو جبکہ طارق نے ایک گول اسکور کئے۔عرفان طاہر اور فہیم خان نے میچ سپروائز کرنے کے فرائض انجام دیئے۔ پاکستان ہاکی فیڈریشن کے کوآرڈینیٹر و سیکریٹری کے ایچ اے حیدر حسین کے مطابق بلدیہ ہاکی کلب کے صدر طارق نیازی ٹورنامنٹ ڈائریکٹر، فیصل جمیل آرگنائزنگ سیکریٹری، اوصاف ربانی ایمپائر منیجر، بلدیہ ہاکی کلب کے سیکریٹری ماجد رفیق چیئرمین ٹورنامنٹ کے فرائض انجام دیں گے۔
