سینٹ جارج (جسارت نیوز)انگلینڈ کے کپتان جو روٹ ٹیسٹ کرکٹ میں اہم سنگ میل حاصل کرنے کے قریب پہنچ گئے۔ جو روٹ کو ٹیسٹ کرکٹ میں 10 ہزار رنز مکمل کرنے کیلئے 116رنز درکار ہیں ۔اگر جو روٹ یہ کارنامہ انجام دیتے ہیں تو وہ ٹیسٹ کرکٹ میں 10ہزار یا اس سے زائد رنز بنانے والے انگلینڈ کے دوسرے اور مجموعی طور پر 14ویں بلے باز ہوں گے۔انگلینڈ کی جانب سے سابق کپتان ایلسٹئر کک نے سب سے زیادہ 12472رنز بنائے ہیں۔مجموعی طور پر ٹیسٹ کرکٹ میں سب سے زیادہ 15921رنز بھارت کے سچن ٹنڈولکر نے بنائے ہیں۔10ہزار یا اس سے زائد رنز بنانے والوں میں آسٹریلیا اور بھارت کے 3،3، سری لنکا اور ویسٹ انڈیز کے 2،2 کھلاڑی شامل ہیں۔
