کراچی ( اسٹاف رپورٹر)یوم پاکستان کے موقع پر کراچی ہاکی ایسوسی ایشن کے تحت گلبرگ ایچ سی اور بلدیہ ایچ سی کے درمیان نمائشی ہاکی میچ کا انعقاد کیا گیا۔ کے ایچ اے اسپورٹس کمپلیکس میں کھیلے گئے میچ کے پہلے ہاف کے ساتویں منٹ میں گلبرگ کلب کے دانیال راشد نے گول کرکے اپنی ٹیم کو ایک گول برتری دلادی جسے بلدیہ کلب کے عدیل نے دسویں منٹ میں گیند جال میں پہنچا کر مقابلہ برابر کردیا دوسرے ہاف میں دونوں ٹیموں نے مزید دو، دو گول کیے لیکن مقررہ وقت میں میچ کا فیصلہ نہیں ہوسکا۔ فاتح ٹیم کے حسن طارق اور مشرف نے 37 اور 43 ویں منٹ میں جبکہ بلدیہ کلب کے فاخر نے 46 اور 50 ویں منٹ میں گول کیے، پینلٹی شوٹ آؤٹ میں گلبرگ ایچ سی نے 4-5 گول سے مقابلہ جیت لیا۔ فاتح ٹیم کے مونیل نیازی اور حمزہ جبکہ بلدیہ کلب کے آصف نے گول اسکور کیے۔ میچ کے اختتام پر مہمان خاص بلدیہ ہاکی کلب کے صدر طارق نیازی نے اولمپیئن حنیف خان، چیئرمین کے ایچ اے گلفراز احمد خان اور سیکریٹری بلدیہ ہاکی کلب ماجد رفیع کے ہمرہ انعامات تقسیم کیے۔ فاتح ٹیم کے کومیل رضا مین آف دی میچ جبکہ بلدیہ ایچ سی کے عزیر جونیئر بہترین کھلاڑی قرار پائے۔
