اسد قیصر نے قانون توڑ کر جرم کیا ہے، مریم اورنگزیب

اسلام آباد (آن لائن) مسلم لیگ (ن) کی ترجمان مریم اورنگزیب نے وزیراعظم عمران خان اور اسپیکر قومی اسمبلی کو خلاف آئین اقدامات پر وارننگ دیتے ہوئے کہا ہے کہ 14 دن میں اجلاس کا آئینی تقاضا پورا نہ کرکے عمران صاحب اور سپیکر آرٹیکل 6 کے جرم کے مرتکب ہوئے ہیں۔ اپنے بیان میں انہوں نے کہا کہ ریکوزیشن جمع ہونے کے بعد 14 دن گزر چکے ہیں،
اسپیکر قومی اسمبلی کا اجلاس نہ بلانا آئین سے انحراف ہے۔ انہوں نے کہا کہ آئین کی واحد تشریح کے باوجودا سپیکر کا 14 دن میں اجلاس نہ بلانا قابل مذمت، افسوسناک اور سراسر غیر آئینی ہے۔ انہوں نے کہا کہ اسپیکر کا رویہ تاریخ میں سیاہ حروف سے لکھا جائے گا کیونکہ وہ آئین پر پارٹی چیئرمین کے مفاد کو ترجیح دے رہے ہیں۔ انہوں نے کہا کہ دستور شکنی غداری اور بغاوت ہے، سزا کے لیے تیار رہیں۔ عمران صاحب کو اقتدار سے اتنی محبت ہے کہ ایک مزید دن بڑھانے کے لیے آئین کو روند دیا ہے۔