ٹی ٹوئنٹی، ون ڈے میچز راولپنڈی سے لاہور منتقل

کراچی (سید وزیر علی قادری) پاکستان اور آسٹریلیا کے درمیان شروع ہونے والے ٹی ٹوئنٹی اور ون ڈے سیریز کے میچز راولپنڈی سے لاہور منتقل کر دیے گئے۔پاکستان کرکٹ بورڈ نے لاہور میں وائٹ بال کرکٹ میچز کروانے کی تصدیق کر دی ، میچز کے شیڈول میں کوئی تبدیلی نہیں کی گئی اور میچز کا مقام مخدوش سیاسی صورتحال کو سامنے رکھتے ہوئے تبدیل کیا گیا ہے۔ذرائع
کے مطابق کرکٹ آسٹریلیا نے بھی لاہور میں ون ڈے سیریز اور ٹی ٹوئنٹی میچز کھیلنے پر آمادگی ظاہر کر دی ہے۔ون ڈے سیریز کا آغاز 29مارچ سے ہونا ہے۔ دوسرا 31مارچ اور تیسرا میچ 2 اپریل کو شیڈول ہے جبکہ واحد ٹی ٹوئنٹی میچ5 اپریل کو کھیلا جائے گا۔ پاکستان اور آسٹریلیا کے درمیان قذافی اسٹیڈیم لاہور میں 3 ایک روزہ میچز دوپہر 3 بجے شروع ہوں گے۔ماہ رمضان کی وجہ سے5 اپریل کو ہونے والے ٹی ٹوئنٹی کے آغاز کا وقت رات ساڑھے8 بجے رکھا گیا ہے۔ ذرائع کے مطابق وائٹ بال سیریز کی ٹکٹوں کی فروخت پیر سے متوقع ہے۔ واضح رہے کہ پہلے سے مجوزہ شیڈول کے مطابق یہ میچز لاہور میں ہی کروانے کا پلان بنایا تھا لیکن بعد میں کرکٹ آسٹریلیا کے کہنے پر راولپنڈی میں وائٹ بال کرکٹ کے میچز کو منتقل کیا گیا تھا، اب سیاسی صورتحال کے تناظر میں انہیں دوبارہ لاہور میں ہی کروانے کا فیصلہ کیا گیا ہے۔اس حوالے سے وزیر داخلہ شیخ رشید نے اپنی پریس کانفرنس میں تمام میچز راولپنڈی سے لاہور منتقل کرنے کی تصدیق کر دی ہے۔