لاڑکانہ (نمائندہ جسارت) ایس ایس پی سرفراز نواز شیخ کی ہدایت پر پولیس نے 24 گھنٹوں کے دوران جرائم پیشہ افراد کے خلاف کارروائیاں کرتے ہوئے اشتہاری و مطلوب 7 ملزمان کو گرفتار کر کے کار گاڑیاں اور منشیات برآمد کر لیں۔ تفصیلات کے مطابق علی گوہرآباد پولیس نے 2 ملزمان عمران ابڑو اور جبار شیخ کو 2150 گرام چرس سمیت، دڑی پولیس نے ملزم نعمان عرف نعمو مہیسر کو 450 گرام چرس سمیت، رتوڈیرو پولیس نے 2 ملزمان ظہیر عباس شیخ اور مختیار عارباٹی کو 100 گرام چرس اور 50 پڑیاں آئس سمیت، سول لائن پولیس نے دوران گشت چوری کے مقدمات میں اشتہاری ملزم نعمت اللہ چانڈیو کو اللہ آباد پولیس نے مطلوب ملزم شیراز کھکھرانی کو گرفتار کرلیا ہے۔ دوسری جانب رتودیرو پولیس نے ایک ماہ پہلے علاقہ تھانہ رشید وگن کی حدود سے شہری علی گل بروہی کی چوری شدہ کار اور سچل پولیس نے شہری اطہر گاڈہی کی چوری شدہ کار برآمد کرکے اصل مالکان کے حوالے کر دی ہیں۔ ایس ایس پی کے مطابق گرفتار ملزمان لاڑکانہ کے مختلف علاقوں میں منشیات سپلائی کیا کرتے تھے جن کے خلاف متعلقہ تھانوں میں مقدمات درج کرکے تفتیش شروع کردی گئی ہے جبکہ گرفتار ملزمان سے دیگر ساتھیوں کے متعلق بھی پوچھ گچھ جاری ہے۔
