اسلام آباد(آئی این پی) مسلم لیگ ضیاکے صدرمحمد اعجاز الحق نے الزام عاید کرتے ہوئے کہا ہے کہ پیپلزپارٹی کے شرپسند کارکنوں کی جانب سے فیصل مسجد میں واقع ضیاالحق شہید کے مزار کی بے حرمتی انکے غیر مہذب ہونے کا ثبوت ہے، یہ واقعہ باقاعدہ منصوبہ بندی اور بلاول اور آصف زرداری کی ایما پر کیا گیا ہے،یہ سانحہ موجودہ حکومت اور اسلام آباد کی ضلعی انتظامیہ کی ناکامی اور غفلت کا نتیجہ ہے۔واقعہ سے ضیاالحق کے چاہنے والوں کی دل آزاری ہوئی ہے، اس شرمناک واقعہ کی جتنی بھی مذمت کی جائے کم ہے۔ اس واقعہ سے حکومت اور پاکستان کی دنیا بھر میں جگ ہنسائی ہوئی ہے۔ مطالبہ کرتے ہیں کہ پاک فوج اپنے سابق آرمی چیف کے مزار کی بے حرمتی کا نوٹس لے،حکومت واقعہ کا نوٹس لیتے ہوئے واقعہ میں ملوث تمام افراد کو کیفر کردار تک پہنچائے۔بدھ کو نیشنل پریس کلب اسلام آباد میںایک ہنگامی پریس کانفرنس کرتے ہوئے سابق وفاقی وزیر اور صدر مسلم لیگ (ض)محمد اعجاز الحق نے کہا کہ گزشتہ شب سندھ سے آنے والے پیپلز پارٹی کے شر پسندوں نے آکر شہید ضیا الحق کے مزار کی بے حرمتی کی ہے،یہ واقعہ ضلعی انتظامیہ اور موجودہ حکومت کی غفلت کی وجہ سے ہوا ہے، یہ سانحہ بلاول اور آصف علی زرداری کے کہنے پر سرانجام دیا گیا ہے،شہید ضیا الحق کے مزار کی بے حرمتی کے خلاف کارروائی نہ ہوئی تو مزید شہیدوں کے مزاروں کی بھی بے حرمتی ہوسکتی ہے،وزیراعظم اور وزیر داخلہ کی جانب سے فون آئے کہ ہم نے پولیس کو مزار کی نگرانی کے لیے ہدایات جاری کردی ہیں آئندہ ایسا نہیں ہوگا ، انہوں نے مطالبہ کیا کہ بلاول اور آصف زرداری کے خلاف بے حرمتی کے حوالے سے ایف آئی آر درج ہونی چاہیے اور واقعہ پربلاول اور زردادی کو معافی مانگنی چاہیے ،جن لوگوں نے مزار کی بے حرمتی کی وہ انکی گاڑیوں میں بیٹھ کے آئے وہ کیسے مزار تک پہنچے اور غلط نعرے لگائے۔
