سبی: بلوچستان کے ضلع سبی کے علاقہ حبیب آباد میں دھماکے کے نتیجے میں 3 افراد جاں بحق جبکہ 30 سے زائد زخمی ہوگئے۔
پولیس کے مطابق دھماکا سبی کے علاقے جیل روڈ پر ہوا، واقعہ کی اطلاع ملتے ہی امدادی ٹیمیں اور سیکیورٹی حکام جائے وقوعہ پر پہنچ گئے۔
ریسکیو کارکنوں نے زخمیوں کو فوری طور پر سول ہسپتال منتقل کردیا اور سیکورٹی فورسز نے علاقے کو گھیرے میں لے لیا۔ پولیس کے مطابق بم ڈسپوزل اسکواڈ کو طلب کرکے شواہد اکھٹے کئے جارہے ہیں۔
ایم ایس ڈاکٹر سرور ہاشمی کا کہنا ہے کہ دھماکے کے 28 زخمی سبی ڈسٹرکٹ اسپتال لائے گئے ہیں جن میں سے بیشتر کی حالت تشویشناک ہے۔
پولیس کے مطابق دھماکا میں دو پولیس اہلکار بھی زخمی ہوئے۔
دوسری جانب صوبائی وزیر احسان شاہ کا کہنا ہے کہ دھماکے کے بعد سبی اور کوئٹہ کے اسپتالوں میں ایمرجنسی نافذ کردی گئی ہے۔
