پیرس(جسارت نیوز)آسٹریلین اوپن سے بنا ویکسین کے باہر ہو جانے والے معروف ٹینس کھلاڑی نوواک جوکووچ کی کورٹ میں واپسی کے امکات روشن ہو چکے ہیں۔فرانس کی حکومت نے اعلان کیا ہے کہ وہ جلد ہی ویکسین پاسز کی لازمی شرط کو ختم کر دے گا۔ اگر یہ شرط ختم ہوئی تو اس کا زیادہ فائدہ سربین ٹینس اسٹار نوواک جوکووچ کو ہو گا۔نوواک جوکووچ اس شرط کے خاتمے کے بعد فرانس میں داخل ہو سکتے ہیں اور وہ رولینڈ گیروس ٹینس ٹائٹل کو دفاع بھی کر سکتے ہیں۔آسٹریلیا کی طرح فرانس میں بھی ویکسینیشن کی شرط عائد تھی جس کی وجہ یہ خدشہ ظاہر کیا جا رہا تھا کہ نوواک جوکووچ آسٹریلین اوپن کی طرح فرنچ اوپن بھی نہیں کھیل پائیں گے۔لیکن رواں ہفتے ہی فرانس کی حکومت نے کورونا پابندیوں میں نرمی کے ساتھ ویکسینیشن کی لازمی شرط کو ختم کرنے کا فیصلہ کر لیا ہے، جس کا اطلاق 14 مارچ سے ہوگا۔مونٹی کارلو ماسٹرز ٹینس کا ایونٹ 9 اپریل سے شروع ہو گا جبکہ رولینڈ گیروس کے مقابلے 22 مئی سے ہوں گے۔فرانس سے آنے والی اس خبر نے سربیا کے عالمی نمبر 2 نوواک جوکووچ کے کانوں تک مسحور کن موسیقی کے طور پر اثر کیا ہے۔واضح رہے کہ نوواک جوکووچ کو ویکسین اور ویزا مسائل کی وجہ سے آسٹریلیا سے غیر رسمی طور پر ملک بدر کر دیا گیا تھا۔
