اسلام آباد: آسٹریلیا کی کرکٹ ٹیم 24 برس بعد سخت سیکیورٹی میں پاکستان کے دورے پر پہنچ گئی ہے۔
پیٹ کمنز کی قیادت میں آسٹریلین ٹیم خصوصی طیارے سے اسلام آباد پہنچی جہاں پاکستان کرکٹ بورڈ کے حکام نے مہمان ٹیم کا استقبال کیا، جس کے بعد کھلاڑیوں کو سخت سیکیورٹی میں ہوٹل منتقل کردیا گیا۔
آسٹریلوی ٹیم 2 روز تک بائیو سیکیور ببل میں رہے گی، کھلاڑیوں کے 2 روز بعد کورونا ٹیسٹ کیے جائیں گے جب کہ آسٹریلوی کرکٹرز کورونا ٹیسٹ منفی آنے پر پریکٹس کریں گے۔
پاکستان پہنچنے والے کھلاڑیوں میں کپتان پیٹ کمنز کے علاوہ اسٹیو اسمتھ، مارنوس لبوشین، جوش ہیزل ووڈ، مچل مارش، عثمان خواجہ، ناتھن لیون، مچل اسٹارک اور دیگر کھلاڑی شامل ہیں۔
کرکٹ آسٹریلیا کی جانب سے بھی سوشل میڈیا پر پیٹ کمنز کی ایک تصویر شیئر کی گئی ہے جس میں انہیں اسلام آباد ائیر پورٹ پر پہنچنے کے بعد خوش گوار موڈ میں دیکھا جا سکتا ہے۔
دونوں ٹیموں کے درمیان پہلا ٹیسٹ 4 مارچ سے راولپنڈی میں شروع ہو گا۔
