پریس کلب کے تحت اسپورٹس گالا ،ٹیبل ٹینس کا انعقاد

حیدرآباد(اسٹاف رپورٹر)صحافیوں کو کھیلوں کی سرگرمیوں کے فروغ کیلیے حیدرآباد پریس کلب اسپورٹس کمیٹی کے زیر انتظام اسپورٹس گالا 2021-22 میں مرحلہ وار کرکٹ، بیڈمنٹن، شطرنج، تاش، لوڈو، ٹیبل ٹینس، کیرم بورڈ اور دیگر کھیل رکھے گئے ہیں جس کے پہلے مرحلہ میں ٹیبل ٹینس کا ایونٹ اختتام پذیر ہو گیا جس کے فائنل میں قسیم قریشی نے سعید افضال کو 2-0سے شکست دیکرٹائٹل اپنے نام کر لیا۔جبکہ سیمی فائنل میں سعید افضال نے عمیر راجپوت کو 2-0سے ہرا دیا اسی طرح دوسرے سیمی فائنل میں بھی قسیم قریشی نے طیب خان کو 2-0سے شکست سے دوچار کیا۔ اسپورٹس گالا2021-22 کے دوسرے مرحلے میں شطرنج اور تاش کے ایونٹ آج 23 فروری بروز بدھ حیدرآباد پریس کلب کے کارڈ روم میں منعقد کیے جائیں گے۔اس حوالے سے اسپورٹس کمیٹی کے سیکرٹری قسیم قریشی کا کہنا ہے کہ جن اراکین نے شطرنج اور تاش میں نام لکھوائے ہیں وہ آج 23 فروری سہ پہر 3 بجے پریس کلب کے ایونٹ میں شرکت کریں۔ ان کا مزید کہنا تھا کہ پریس کلب کی طرف سے کھیلوں کے انعقاد کا میڈیا سے وابستہ صحافی جو اپنی پیشہ وارانہ ذمہ داریوں کی وجہ سے مصروف رہتے ہیں انہیں تفریح فراہم کرنا ہے۔