لاڑکانہ (بیورو رپورٹ) لاڑکانہ پولیس نے 2 مبینہ مقابلوں میں 2 ملزمان کو گرفتار کرکے چھینی گئی موٹر سائیکل اور اسلحہ برآمد کرلیا ہے۔ تفصیلات کے مطابق لاڑکانہ شہر کے تھانہ دڑی کی پولیس نے دوران گشت اتاترک ٹاور کے قریب مسلح ملزمان سے مقابلے کے دوران ایک ڈاکو بخشل ولد قربان علی کو زخمی حالت میں گرفتار کرلیا، ملزم سے اسلحہ اور موٹرسائیکل برآمد کرلی گئی، موٹر سائیکل 24 ستمبر کو شہری علی اصغر سے چھینی گئی تھی جبکہ ملزم مختلف تھانوں میں درج سنگین مقدمات میں مطلوب تھا۔ دوسری جانب تھانہ نوڈیرو پولیس نے سعدو دیرو لاڑو کے قریب جرم کے ارادے سے کھڑے ملزمان اور پولیس کے درمیان مقابلے میں ملزم فرحان ولد عبدالمجید جتوئی کو زخمی حالت میں اسلحے سمیت گرفتار کرلیا، جس کا مختلف تھانوں سے مجرمانہ رکارڈ حاصل کیا جا رہا ہے۔
