اسلام آباد (صباح نیوز) عدالت عظمیٰ نے بریگیڈئر(ر) حامد محمود کی بریت کا فیصلہ معطل کردیا، جسٹس سردار طارق مسعود کی سربراہی میں 3 رکنی بینچ نے بریت کیخلاف نیب کی اپیل سماعت کیلیے منظور کرلی اوربریگیڈئر ریٹائرڈ حامد محمود کو نوٹس جاری کردیا۔ نیب کے وکیل نے دائر درخواست میں موقف اختیار کیا ہے کہ نظام پور سیمنٹ پلانٹ کیلیے 24 لاکھ ڈالرز کا سنگاپور سے کوئلہ خریدا گیا، بریگیڈئر(ر) حامد محمود نے کوئلے کی قیمت غیر متعلقہ شخص کو ڈیلیور کرائی، ان کے اکاؤنٹ میں 1 لاکھ 15 ہزار ڈالرز منتقل ہوئے۔ نیب کے وکیل نے موقف اپنایا ہے کہ ملزم کے خلاف ٹھوس شواہد ہیں، پیسہ ان کے اکائونٹ میں آنا بھی ثابت ہوا ہے، انہوں نے عدالت کو مزید بتایا کہ احتساب عدالت نے ملزم کو 12 سال کی سزا سنائی، ہائیکورٹ نے اپیل میں ملزم کو رہا کیا، ملزم کی رہائی کا فیصلہ معطل کرکے اپیل کو سماعت کیلیے منظور کیا جائے۔
