اسلام آباد(آن لائن) سیکرٹری جنرل مسلم لیگ(ن)احسن اقبال نے کہا ہے کہ تحریکِ عدم اعتماد کے لیے اپوزیشن کوششیں کررہی ہے،ہوم ورک جاری ہے عدم اعتماد ایک ریفرنڈم ہوگا، عمران خان پاکستان کو ہٹلر کی ریاست بنانا چاہتے ہیں اس کی اجازت نہیں دیں گے، قومی اسمبلی میں پی ٹی آئی میں بھی ایک طبقہ موجود ہے جس نے ابھی فیصلہ کرنا ہے، پاکستان کی ریاست نے اس بند گلی سے نکلنا ہے، حکومت ڈیم بنانے کے وعدے کر کے آئی تھی ایک بند نہیں بنا لیکن میڈیا کی آواز بند کرنا چاہتی ہے، پاکستان کے میڈیا نے تمام مصیبتوں کے باوجود اظہارِ رائے کی آزادی پر سمجھوتا نہیں کیا ۔ ان خیالات کااظہار انہوں نے جمعرات کے روز میڈیا سے گفتگو کرتے ہوئے کیا ۔احسن اقبال نے کہا کہ ملک کی سب سے بڑی کابینہ عمران نیازی کی ہے ۔ مرکز اور پنجاب میں مزید وزرا کی بھرتی کی جارہی ہے۔اس کا مطلب ہے آپ رشوت کے طور پر وزارتیں بانٹ رہے ہیں۔ پیٹرول کی قیمت میں 12 روپے اضافہ عوام کو بڑا جھٹکا ہے، ایسے جھٹکوں سے پیداواری صلاحیت متاثر ہوتی ہے ۔عمران نیازی کے پاس کوئی وژن نہیں ہے، ان کی پالیسیوں سے معاشی استحکام نہیں آئے گا۔
