لاہور(سید وزیر علی قادری) شان مسعود اور محمد رضوان کی ان فارم اوپننگ جوڑی نے کراچی کنگز کے خلاف 100 رنز کی شاندار شراکت قائم کرکے ملتان سلطانز کو 7 وکٹوں سے کامیابی دلا کر اپنی ٹیم کو ایک مرتب پھر پی ایس ایل 7 کی وننگ ٹریک پر چڑھا دیا۔ کپتان محمد رضوان نے ٹورنامنٹ میں اپنی چوتھی نصف سنچری اسکور کی۔دفاعی چیمپئن کی یہ ایونٹ میں 7ویں کامیابی ہے۔8 گروپ میچز کھیلنے والی کراچی کنگز کی ٹیم اب تک ٹورنامنٹ میں کوئی بھی میچ نہیں جیت سکی۔ فاتح ٹیم نے 175 رنز کا ہدف 19ویں اوور کی تیسری گیند پر محض 3 وکٹوں کے نقصان پر حاصل کرلیا۔ مطلوبہ ہدف کے تعاقب میں محمد رضوان نے 8 چوکوں کی بدولت 76 رنز کی اننگز کھیلی۔ شان مسعود نے 6 چوکوں کی مدد سے 45 رنز اسکور کیے۔ ملتان سلطانز کو آخری 2 اوورز میں جیت کے لیے 29 رنز درکار تھے کہ خوشدل شاہ نے کرس جارڈن کو 3 گیندوں پر 2 چھکے اور ایک چوکا لگا کر میچ میں دفاعی چیمپئن کی پوزیشن مزید مستحکم کردی۔خوشدل شاہ نے 9 گیندوں پر ناٹ آؤٹ 21 رنز بنائے۔رائیلی روسو 5 گیندوں پر 14 رنزبناکر ناٹ آؤٹ رہے میر حمزہ نے 2 اور کرس جارڈن نے ایک کھلاڑی کو آؤٹ کیا۔ اس سے قبل کراچی کنگز نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 174 رنز بنائے جو کلارک اور شرجیل خان بالترتیب 40 اور 36 رنز بناکر نمایاں رہے۔ دونوں کھلاڑیوں نے دوسری وکٹ کے لیے 72 رنز کی شراکت قائم کی۔ اختتامی اوورز میں عماد وسیم نے 16 گیندوں پر 5 چوکوں اور ایک چھکے کی مدد سے 32 رنز کی ناقابل شکست اننگز کھیلی۔ محمد نبی اور روحیل نذیر نے 21،21 رنز اسکور کیے۔ شاہنواز دھانی نے دو جبکہ خوشدل شاہ، بلیسنگ مزاربانی، عمران طاہر اور رومان رئیس نے ایک، ایک وکٹ حاصل کی۔
