لاڑکانہ(نمائندہ جسارت) لاڑکانہ پولیس نے ضلع کے مختلف علاقوں میں جرائم پیشہ افراد کے خلاف کارروائیاں کرتے ہوئے سنگین نوعیت کے مقدمات میں اشتہاری و مطلوب چار ملزمان کو گرفتار کرکے چوری شدہ مویشی، چنگ چی رکشا، موبائل فون، موٹرسائیکلیں، سولر پلیٹس اور گٹکوں سمیت گرفتار کرکے مقدمات درج کرلیے۔ تفصیلات کے مطابق کنگا پولیس نے اشتہاری ملزم واجد جتوئی کو، دڑی پولیس نے ڈکیت یاسین تنیو کو شہری رفیق احمد سے چھینی جانے والی نقدی اور موبائل فون سمیت، ولید پولیس نے ملزم عامر جتوئی کو گٹکوں سمیت، حیدری پولیس نے ملزم وسیم عباس کھہاوڑ شراب کی بوتلوں سمیت گرفتار کرلیا، دوسری جانب دہامراہ پولیس نے سے چوری شدہ دو موٹرسائیکلیں، رتوڈیرو پولیس نے شہری محمد مور گھوٹو کی چوری شدہ گائے، سیہڑ پولیس نے شہری شفیق احمد اور نیاز احمد کاندہڑو کی چوری شدہ سولر پلیٹس اور کنگا پولیس نے ممتاز علی شیخ کا چوری شدہ چنگ چی رکشا اور شہری اعجاز علی کی چوری شدہ تین گائیں برآمد کرکے تمام ملزمان کے خلاف مقدمات درج کرلیے ہیں۔ پولیس کے مطابق گرفتار ملزمان کے خلاف تفتیش جاری ہے۔
