aAلاہور(نمائندہ خصوصی)پاکستان کرکٹ ٹیم کے چیف سلیکٹر نے آسٹریلیا کے خلاف3 ٹیسٹ میچز کی سیریز کیلیے 16کھلاڑیوں اور 5 ریزرو کھلاڑیوں پرمشتمل قومی اسکواڈ کا اعلان کردیا ہے جبکہ پی سی بی نے ثقلینمشتاق کو مزید 12ماہ کے لیے پاکستان کا ہیڈ کوچ مقرر کردیا ہے۔ محمد یوسف کو آسٹریلیا سیریز کے لیے بیٹنگ کوچ جبکہ شان ٹیٹ کو 12ماہ کے لیے پاکستان کا فاسٹ بولنگ کوچ مقرر کرنے کا بھی اعلان کردیا ہے۔ دونوں ٹیموں کے مابین سیریز کا پہلا ٹیسٹ میچ راولپنڈی (4تا 8مارچ)، دوسرا کراچی (12تا 16مارچ)اور تیسرا لاہور (21تا 25مارچ)میں کھیلا جائے گا۔ آسٹریلیا کے خلاف ٹیسٹ سیریز کے لیے قومی ٹیسٹ اسکواڈ میں 3 تبدیلیاں کی گئی ہیں۔فاسٹ بولر حارث رئوف اور اوپنر شان مسعود کی ٹیسٹ اسکواڈ میں واپسی ہوئی ہے۔حارث رئوف جنوبی افریقا اور زمبابوے کے خلاف قومی ٹیسٹ اسکواڈ کا حصہ تھے ۔شان مسعود نے آخری مرتبہ سیزن 21-2020 میں دورہ نیوزی لینڈ میں پاکستان کی نمائندگی کی تھی۔ان دونوں کھلاڑیوں کو اسپنر بلال آصف اور اوپنر عابد علی کی جگہ اسکواڈ میں شامل کیا گیا ہے ۔ اسکواڈ میں شامل 21 ویں رکن یاسر شاہ کو ریزرو کھلاڑیوں میں شامل کیا گیا ہے۔قومی ٹیسٹ اسکواڈ میں شامل جو کھلاڑی پی ایس ایل کا حصہ نہیں ہیں وہ 16فروری سے نیشنل اسٹیڈیم کراچی میں تربیتی کیمپ کا حصہ بن جائیں گے۔قومی ٹیسٹ اسکواڈ میںبابر اعظم(کپتان)،محمد رضوان(نائب کپتان) ، عبداللہ شفیق،اظہر علی،فہیم اشرف،فواد عالم،حارث رئوف،حسن علی،امام الحق،محمد نواز،نعمان علی،ساجد خان ،سعود شکیل ،شاہین شاہ آفریدی،شان مسعود اورزاہد محمود شامل ہیں۔ریزرو پلیئرز میںکامران غلام ،محمد عباس ،نسیم شاہ ،سرفراز احمد،یاسر شاہ اورمحمد وسیم شامل ہیں۔چیف سلیکٹر پاکستان کرکٹ محمد وسیم کا کہنا ہے کہ آسٹریلیا کے خلاف ٹیسٹ سیریز کے لیے قومی ٹیسٹ اسکواڈ میں زیادہ تبدیلیاں کرنے کی بجائے ایک تسلسل برقرار رکھا گیا ہے۔
