راولپنڈی (آن لائن) پاکستان اور سعودی عرب کی مسلح افوج کے درمیان فوجی مشقیں ملتان میں شروع ہوگئیں، جوائنٹ میکنائزڈ تربیت کیلیے سعودی بری فوج کا دستہ ملتان گریژن پہنچ گیا، جہاں یہ دستہ 2 ماہ جاری رہنے والی میکنائزڈ ٹریننگ میں حصہ لے گا۔ آئی ایس پی آر کے مطابق مشقوں کی افتتاحی تقریب ملتان گریژن میں ہوئی۔ جنرل آفیسر کمانڈنگ میجر جنرل ظفر اقبال مروت افتتاحی تقریب کے مہمان خصوصی تھے، دونوں ممالک کے شریک دستے بھی افتتاحی تقریب میں شریک ہوئے، ان مشقوں میں مختلف نوعیت کی ڈرلز کی جائیں گی، مشترکہ تربیت کا مقصد ایک جامع پروگرام کے ذریعے صلاحیتوں اور مہارتوں کو بہتر کرنا ہے۔
