نقطہ نظر

تعلیم کا حاصل وصول
ہم جس دور میں زندگی گزار رہے ہیں یہ نفسی نفسی کا دور ہے یہاں ہر کوئی ایک دوسرے سے آگے نکل جانا چاہتا ہے ہر کسی کا نظریہ زیادہ سے زیادہ پیسے کمانا ہے۔ ہمارے معاشرے میں تعلیم صرف اور صرف روپیہ کمانے کا ذریعہ بن چکی ہے۔ ہمیں اپنے بچوں کو سکھانا چاہیے کہ تعلیم روپیہ پیسہ ہی نہیں یہ تمیز ہے، تہذیب ہے، تمدن ہے۔ تعلیم کا مقصد ایک سچا مسلمان ایک صالح انسان معاشرے میں پیدا کرنا ہے۔ ایسا انسان جو دوسروں کو بھی ترغیب دلائے کہ ہمیں کس طرح گھر، خاندان اور پڑوسی کے حقوق ادا کرنے ہیں۔ ہمیں اپنے بچوں کو شروع دن سے یہ بتلانا ہے تم اچھے اور برے کاموں اور باتوں میں فرق کرو، صحیح اور اچھے راستے کا انتخاب کرو۔
نمرہ اقبال، ضلع کورنگی شرقی
بڑھتی راہزنی پر قابو پایا جائے
راہ زنی کی وارداتیں روز بروز بڑھتی جارہی ہیں، پولیس ان معاملات میں کوئی موثر اقدام کرنے سے قاصر نظر آتی ہے۔ ہرگلی میں کوئی نہ کوئی ان وارداتوں سے متاثر نظر آتا ہے، عوام کی جان و مال محفوظ نہیں ہیں، حکومت اس طرف خصوصی توجہ دے اور متعلقہ اداروں کو توجہ دلائی جائے تاکہ عوام کی مشکلات میں کمی آسکے۔
سمیرا فیصل، گول مارکیٹ، ناظم آباد نمبر3