تھر میں کوئلے کے بڑے ذخائر نکل آئے ،پاکستانی و چینی ماہرین کا جشن

کراچی (اسٹاف رپورٹر)صوبہ سندھ میں محنت کشوں کی دن رات کی محنت کے بعد کوئلے کے ذخائر نکل آئے، وزیر اعلی سندھ نے قوم کو مبارکباد دی ہے۔تفصیلات کے مطابق تھرکول منصوبے بلاک ون پر کام کرنی والی کمپنی کی کھدائی کا کام مکمل ہوگیا، کمپنی کی انتظامیہ نے کول تک پہنچ کر اہم سنگ میل عبور کرلیا۔ذرائع کے مطابق پیرکی صبح کان کی145میٹر کھدائی کا کام مکمل ہونے کے بعد کوئلہ نکل آیا، بلاک ون سائٹ پر پاکستانی انتظامیہ و چینی ماہرین کی جانب سے کامیابی پر جشن منایا گیا۔ماہرین نے بتایاکہ
بلاک ون میں 3 بلین ٹن یا 5 بلین بیرل خام تیل کے مساوی ذخائر ہیں، تھر کول بلاک ون انتظامیہ کا کہنا ہے کہ پہلے مرحلے میں سالانہ پیداوار7.8 ملین ٹن ہے، انتظامیہ کے مطابق بلاک ون کی سی پیک کے تحت درجہ بندی کی گئی ہے۔اس حوالے سے وزیراعلی سندھ سید مراد علی شاہ کی جانب سے تھرکول فیلڈ بلاک ون سے کوئلہ برآمد ہونے پر عوام کومبارکباد پیش کی ہے، ان کا کہنا ہے کہ شہید بینظیر بھٹو کے ویژن کے مطابق یہ سندھ حکومت کی دوسری بڑی کامیابی ہے۔مراد علی شاہ نے کہا کہ تھر کول فیلڈ بلاک ون میں 3ارب ٹن کوئلہ کے ذخائر موجود ہیں، کوئلے کے مذکورہ ذخائر5ارب بیرل خام تیل کے برابر ہیں۔وزیراعلی سندھ نے کہاکہ ہم ہمیشہ سے یہ کہتے آئے ہیں کہ تھر بدلے گا پاکستان۔ آج یہ نعرہ حقیقت بنتا جارہا ہے۔پیرکی صبح بلاک ون میں 145 میٹر کھدائی کے بعد کوئلہ نکلا ہے، میں چین کی کمپنی کو بھی ان کی کامیابی پر مبارکباد پیش کرتا ہوں۔