پاکستان تحریک انصاف سعودی عرب کی سینئر قیادت پر مشتمل وفد نے مکہ مکرمہ میں اسپیکر قومی اسمبلی اسد قیصر، وزیر اعظم کے معاون خصوصی برائے اوورسیز پاکستانیز ایوب آفریدی ، ایم این اے ڈاکٹر حیدر علی اور صالح محمد خان سواتی سے خصوصی ملاقات کی اور کمیونٹی کو درپیش مسائل سمیت بیرون ملک پاکستانیوں کو ووٹ کا حق دلانے کے معاملے پر تفصیلی گفتگو کی۔ وفد کی سربراہی پی ٹی آئی کے سینئر رہنما ڈاکٹر خالد عظیم خٹک نے کی۔ وفد میں پی ٹی آئی سعودی عرب کے انفارمیشن سیکرٹری ارسلان شاہد، صدر پی ٹی آئی مکہ ریجن ڈاکٹر انور جاوید، نائب صدر پی ٹی آئی مکہ ارشد سیال ، انفارمیشن سیکرٹری پی ٹی آئی مکہ علی رضا اور سینئر رہنما پی ٹی آئی مکہ فاروق بیداللہ شامل تھے۔ وزیر اعظم کے معاون خصوصی برائے اوورسیز پاکستانیز ایوب آفریدی نے وفد کی تجاویز اور مسائل کو توجہ سے سنا اور فوری حل کی یقین دہانی کراتے ہوئے کہا کہ اوورسیز پاکستانی ملکی اثاثہ ہیں۔ وزیر اعظم عمران خان اوورسیز کے مسائل حل کرنے میں خود دلچسپی رکھتے ہیں۔ انہوں نے کہا کہ ہماری بھرپور کوشش ہے کہ آنے والے الیکشن میں اوورسیز پاکستانی اپنا ووٹ کا حق استعمال کر سکیں۔
