گلگت(کامرس ڈیسک):گلگت بلتستان میں سرمائی سیاحت کے فروغ کے حوالے سے وزیراعلی گلگت بلتستان خالد خورشید اور کنیڈین ہائی کمشنر نے اہم ٹویٹس کیے،پاکستان میں تعینات کنیڈین ہائی کمشنر نے سکردو میں آئس ہاکی گراونڈ کی تصویر شئیر کرکے اپنے ٹویٹر پیغام میں کنیڈین آئس ہاکی ٹیموں کو گلگت بلتستان میں کھیلنے کی دعوت دی ہے جبکہ آ ئس ہاکی کے ضمن میں ہی اس پر وزیر اعلی گلگت بلتستان خالد خورشید نے اہم ٹویٹر پیغام جاری کیا ہے۔ انہوں نے کہا کہ گلگت بلتستان سرمائی کھیلوں کا ایک بہترین مقام ہے، ہماری حکومت اور لوگ گلگت بلتستان میں سرمائی کھیلوں کے بین الاقوامی ٹیموں اور کھلاڑیوں کو خوش آمدید کرنے اور انکی میزبانی کے لئے پرجوش ہیں۔ وزیر اعلی گلگت بلتستان خالد خورشید نے اپنے ٹویٹ میں مزید کہا ہے کہ گلگت بلتستان میں سرمائی کھیلوں کے ایونٹس کی قومی سطح پر اور دنیا بھر میں پروموشن کے حوالے سے کنیڈین ہائی کمشنر کے بھرپور تعاون پر ان کے مشکور ہیں۔
