اسلام آباد (آن لائن) چیئرمین پاکستان پیپلز پارٹی بلاول زرداری نے پیر کے روز مصروف دن گزارا، ان سے زرداری ہائوس اسلام آباد میں ملاقات کے دوران چترال سے تعلق رکھنے والے شہزادہ محی الدین کے صاحبزادے شہزادہ خالد پرویز نے مسلم لیگ نواز چھوڑ کر پاکستان پیپلزپارٹی میں شمولیت اختیار کی۔ بلاول زرداری سے پیپلزپارٹی خیبرپختونخوا کے صدر نجم دین خان ، گلگت بلتستان کے صدر امجد ایڈووکیٹ، سابق وزرائے اعلی شیر جہان میر، میر افضل، عبدالجہان وقار ممدوق، سابق آئی جی افضل شگری، ڈاکٹر شریف اور عمران ندیم، آزاد جموں و کشمیر کے جنرل سیکرٹری اور قانون ساز اسمبلی ۱کے فیصل راٹھور، پیپلزپارٹی آزاد کشمیر کے صدر چودھری یاسین اور سردار نبیل گبول نے بھی ملاقات کی۔ ملاقات کے دوران ملکی سیاسی صورتحال پر گفتگوکی گئی اور چیئرمین پی پی کو لانگ مارچ کی تیاریوں اور عوامی رابطہ مہم سے بھی آگاہ کیا گیا۔
