اسلام آباد (اسٹاف رپورٹر) محکمہ موسمیات نے آئندہ منگل سے جمعرات تک مری، خیبر پختونخوا کے چند اضلاع اور آزاد کشمیر میں بارشوں اور پہاڑوں پر برفباری کا امکان ظاہر کیا ہے۔ پی ڈی ایم اے خیبرپختونخوا کی جانب سے ضلعی انتظامیہ اور متعلقہ اداروں کو اس حوالے سے مراسلہ بھی روانہ کر دیا گیا ہے۔ڈی جی پی ڈی ایم اے کا کہنا ہے کہ ضلعی انتظامیہ اور متعلقہ اداروں کو پیشگی اقدامات کی ہدایات کی ہے اور لنک روڈزکی بحالی کے لیے مشینری کی دستیابی یقینی بنانے کا کہا ہے۔ علاوہ ازیں سیاحوں کو دوران سفر احتیاطی تدابیراختیار کرنے کی بھی ہدایات جاری کی گئی ہیں۔ محکمہ موسمیات کے مطابق بالائی اضلاع میں بارش اور برفباری کے باعث لینڈ سلائیڈنگ کا خدشہ ہے۔ چترال،دیر، سوات، ملاکنڈ، کوہستان، شانگلہ اور بونیر میں وقفے وقفے سے بارش کا امکان ہے جبکہ مانسہرہ، ایبٹ آباد، ہری پور، صوابی، مردان اور نوشہرہ میں بھی بارش کی پیش گوئی کی گئی ہے۔
