کراچی(سید وزیر علی قادری) پاکستان سپرلیگ 7 کی افتتاحی تقریب سادہ اور پروقار ہوگی۔ پی سی بی ذرائع کے مطابق پی ایس ایل میں اس مرتبہ سادگی کو اپنایا جائے گا۔ اس کے علاوہ کووڈ کی صورتحال اورلاجسٹک مسائل کے باعث گزشتہ ایڈیشنز کے برعکس 27جنوری کوکراچی کے نیشنل اسٹیڈیم میں میچز کے آغاز سے قبل ثقافتی سرگرمیاں نہیں ہوں گی۔مختصر تقریب میں چیئرمین پی سی بی رمیز راجا خطاب کریں گے جس کے بعد میچز کا آغاز ہوجائے گا۔پی ایس ایل 7کا ترانہ 20یا 21جنوری ریلیز کردیا جائے گا۔دوسری طرف پاکستان کرکٹ بورڈ نے اعلان کیا ہے کہ پی ایس ایل کے میچوں کے ٹکٹوں کی فروخت بک می ڈاٹ کام پر شروع ہوگئی ہے۔ منگل کوجاری اعلامیہ کے مطابق 27 جنوری سے شروع ہونے والے ایونٹ کا پہلا مرحلہ نیشنل اسٹیڈیم کراچی جبکہ دوسرا مرحلہ 10سے 27فروری قذافی اسٹیڈیم لاہور میں کھیلا جائے گا۔ مداحوں کی سہولت کے لیے پی سی بی نے پہلی مرتبہ ایک ایسی پیشکش متعارف کروائی ہے کہ جس کے تحت 17جنوری تک بک کی جانے والے فرسٹ کلاس اور جنرل اسٹینڈز کے ٹکٹوں پر خصوصی رعایت دی جائے گی۔ان میں پلے آف یا فائنل کے ٹکٹس شامل نہیں ہیں۔ ٹکٹ خریدتے وقت شائقینِ کوا ین سی او سی کے فیصلے کے مطابق 12 سال سے زائد عمر کے تمام افراد کو اسٹیڈیم میں داخلے کے لیے کوویڈ 19کی مکمل ویکسینیشن کا درست سرٹیفیکٹ دکھانا لازمی ہوگا۔کوئی بھی شہری ایک شناختی کارڈ پر زیادہ سے زیادہ6 ٹکٹس خرید سکتا ہے۔جس کے لیے شہری کو ا پنا شناختی کارڈ نمبر اور فون نمبر دینا لازمی ہوگا، جہاں ایزی پیسہ، جاز کیش، کریڈٹ کارڈ، این آئی ایف ٹی کے ذریعے رقم جمع کروائی جاسکے گی۔ 27 جنوری کو شیڈول ٹورنامنٹ کے افتتاحی میچ کے لیے جنرل اسٹینڈز کے ٹکٹ کی قیمت500 روپے مقرر کی گئی ہے جبکہ فرسٹ کلاس انکلوژرز کے ٹکٹ کی قیمت 1500 ، پریمیئم انکلوژرز 2ہزاراور وی آئی پی انکلوژرز کے ٹکٹ کی قیمت 2500روپے مقررکی گئی ہے ۔
