لاہور (صباح نیوز) مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے کہا ہے کہ سانحہ مری سے متعلق حکومت سچائی اور اصل حقائق بتائے۔انہوں نے ایک بیان میں کہا کہ مری سانحہ کے بعد یہ ثابت ہو گیا کہ ملک میں حکومت نام کی کوئی چیز نہیں‘ ملک پر صرف نالائقی، نااہلی، بے حسی اور ظلم مسلط ہے‘ سانحہ مری سے متعلق حکومت سچائی اور اصل حقائق بتائے تاکہ اس کے مطابق حکمت عملی بنائی جاسکے‘ حکومت بیانات کے بجائے مری اور دیگر علاقوں میں پھنسے عوام کو نکالنے کے لیے موثر اقدامات کرے۔ انہوں نے کہا کہ ہزاروں گاڑیوں کے اب بھی پھنسے ہونے کی اطلاعات پر شدید تشویش ہے‘ عوام اور پھنسے سیاحوں کے خاندان مضطرب اور پریشان ہیں‘ ریسکیو اور ریلیف کے اقدامات میں یکجائی لائی جائے‘ پھنسے مسافروں کی رہائش اور خوراک کے انتظامات کے علاوہ ان کی محفوظ گھروں کو واپسی یقینی بنائی جائے۔ انہوں نے کہا کہ سیاحوں کی مدد پر مقامی افراد کے جذبے کو خراج تحسین پیش کرتا ہوں‘حکومت بیان بازی اور عوام کو مورد الزام ٹھہرانے کے بجائے اپنی آئینی، قانونی اور انتظامی ذمہ داریوں کو پورا کرے‘ معصوم بچوں سمیت دیگر وفات پانے والوں کے اہل خانہ سے دلی ہمدردی ہے‘ یہ واقعہ ہمارے دل زخمی کرگیا‘ بروقت اقدامات ہو جاتے اور انتظامی سوجھ بوجھ سے کام لیا جاتا تو اتنا بڑا حادثہ نہیں ہوتا‘ فوج اور رینجرز کا ریلیف اور ریسکیو آپریشن لائق تحسین ہے۔
