لاڑکانہ(نمائندہ جسارت) تعلیمی بورڈ کی جانب سے گیارہویں جماعت کے سالانہ نتائج کا اعلان کردیا گیا، کنٹرولر تعلیمی بورڈ لاڑکانہ فخرالدین احمد بابر ابڑو کے مطابق گیارہویں جماعت کے سالانہ امتحانات میں لاڑکانہ، قمبر شہدادکوٹ، شکارپور، جیکب آباد، کشمور کندھکوٹ سمیت دادو ضلع کی 2 تحصیلوں خیرپور ناتھن شاہ اور میہڑ سے تعلق رکھنے والے 37831 امیدواروں نے حصہ لیا، جن میں سے 31218 پاس اور 1696 امیدوار فیل ہوئے، اسی طرح گیارہویں جماعت کے پری میڈیکل گروپ میں مجموعی طور پر 24789 امیدواروں نے حصہ لیا جن میں 20773 پاس، 1017 فیل اور 119 کو کاپی کیس قرار دے کر 345 امیدواروں کے نتائج نامکمل کاغذات اور امتحانی فیس جمع نہ کروانے کے باعث روک دیے گئے، پری انجینئرنگ گروپ میں 12128 امیدواروں نے حصہ لیا، جن میں 9730 امیدوار پاس اور 599 فیل ہوئے اور 106 امیدواروں کو کاپی کیس کرکے 51 امیدواروں کے نتائج نامکمل کاغذات اور فیسجمع نہ کروانے کے باعث روک دیے گئے، ہیومنٹیز گروپ میں 365 امیدواروں نے حصہ لیا جن میں 329 پاس اور 9 فیل ہوئے جبکہ ہیومنٹیز پرائیوٹ گروپ میں 549 امیدواروں نے حصہ لیا، جن میں 386 پاس اور 71 فیل جبکہ 15 کو کاپی کیس قرار دے کر 18 امیدواروں کے نتائج نامکمل کاغذات اور فیس جمع نہ کروانے کے باعث روک دیے گئے ہیں۔
