پشاور پولیس نے منشیات کے دھندے میں ملوث عناصر کے خلاف کریک ڈائون کے دوران چار ملزمان کو گرفتار کر لیا۔تفصیلات کے مطابق تھانہ سربند ، تھانہ ریگی اور تھانہ چمکنی پولیس کی جانب سے ہونے والی کارروائیوں کے دوران گرفتارملزمان میں اسرار ولد میاں نذیر، شکیل ولد باز خان، نختر علی ولد موسیٰ خان اور خالد ولد سید رحمان شامل ہیں جن میں سے دو کا تعلق ضلع خیبر جبکہ دو پشاور کے رہائشی ہیں۔ چاروں افراد نے ابتدائی تفتیش کے دوران منشیات کے مکروہ دھندے میںملوث ہونے کا اعتراف کرتے ہوئے نواحی علاقوں میں مخصوص گاہک سمیت متعدد ڈیلرز کو بھی منشیات سپلائی کا اعتراف کرلیا جن کے قبضے سے 19 کلو گرام اعلیٰ کوالٹی چرس، 15 کلو گرام افیون، 713 گرام ہیروئن ،270 گرام آئس اور منشیات سپلائی میں استعمال ہونے والی موٹر سائیکل بھی برآمد کرلی ۔ ملزمان کی نشاندہی پر متعدد ڈیلر زکو بھی شامل تفتیش کر لیا گیا جن کی گرفتاری بھی جلد متوقع ہے، چاروں ملزمان کے خلاف مقدمات درج کر کے تفتیش شروع کر دی گئی ہے۔
