کراچی (اسٹاف رپورٹر) پاکستان پیپلز پارٹی کے چیئرمین بلاول زرداری سے پی پی پی کراچی ڈویژن کے صدر،وزیراطلاعات سندھ سعید غنی، ترجمان سندھ حکومت و ایڈمنسٹریٹر کراچی مرتضیٰ وہاب کی ملاقات، اس موقع پر کراچی میں ترقیاتی کاموں کی رفتار، بلدیاتی مسائل کے حل میں تسلسل سمیت شہر کی مجموعی صورتحال پر بات چیت کی گئی۔ علاوہ ازیں پاکستان پیپلزپارٹی کے چیئرمین بلاول زرداری نے پیپلز پارٹی ضلع وسطی اور ضلع ملیر کے عہدیداروں کا اعلان کردیا۔ بلاول ہائوس میڈیا سیل سے جاری نوٹیفکیشن کے مطابق مسرور احسن ضلع وسطی کے صدر اور سلمان عبداللہ مراد ضلع ملیر کے صدر ہوں گے۔ دوسری جانب بلاول زرداری سے پی پی پی کراچی ڈویژن کے نائب صدر مرزا مقبول نے بھی ملاقات کی اور کراچی کے سیاسی حالات پر تبادلہ خیال کیا۔ چیئرمین پیپلز پارٹی سے وزیراعلیٰ سندھ کے معاون خصوصی ارسلان شیخ نے بھی ملاقات کی، اس موقع پر چیئرمین بلاول زرداری کو سکھر کے عوامی مسائل اور ان کے حل پر بریفنگ دی گئی۔
