لاڑکانہ(نمائندہ جسارت) خیرپور پل روڈ پر تیز رفتار کار کی موٹرسائیکل سے ٹکر ،موٹرسائیکل سوار گاؤں کیہر کا رہائشی ضعیف شخص منور علی عباسی شدید زخمی ہو گیا جسے کار ڈرائیور نے تشویش ناک حالت میں چانڈکا اسپتال منتقل کیا،جہاں دوران علاج زخموں کے تاب نہ لاتے ہوئے دم توڑگیا، اس موقع پر کار ڈرائیور کا کہنا تھا کہ کار اور موٹرسائیکل میں ٹکر کے نتیجے میں حادثہ پیش آیا ہے، دوسری جانب ضروری کارروائی کے بعد متوفی کی لاش ورثا کے حوالے کردی گئی ۔دوسری جانب مری چوک پر لاڑکانہ سے کراچی جانے والی کوچ اور موٹرسائیکل میں ٹکر کے نتیجے میں تعلقہ تھانہ کے اے ایس آئی شوکت جتوئی اور 2 بیٹے 14 سالہ ضامن علی اور 12 سالہ علی مردان جتوئی شدید زخمی ہوگئے، اطلاع پر حد کے تھانہ کی پولیس نے پہنچ کر زخمی اے ایس آئی اور ان کے دونوں بیٹوں کو زخمی حالت میں چانڈکا اسپتال کے شعبہ حادثات منتقل کردیا جہاں انہیں طبی امداد دی گئی، اس موقع پر زخمی اے ایس آئی شوکت جتوئی نے بتایا کہ صبح میرے دونوں بیٹے مجھے ڈیوٹی کے لیے تعلقہ تھانے لے جارہے تھے۔قمبر شہداد کوٹ ضلع کی تحصیل وارہ کے گاؤں گل محمد تونیو میں 7 بچوں کی والدہ خاتون سکینہ خاتون زوجہ جڑیل تونیو نے گھر والوں سے معمولی بات پر جھگڑا کرنے کے بعد زہریلی ادویات پی کر خودکشی کی کوشش کی جسے ورثا کی جانب سے بے ہوشی کی حالت میں چانڈکا اسپتال منتقل کیا گیا ۔
