کراچی(اسٹاف رپورٹر)سابق وزیراعظم بینظیر بھٹو کی 14ویں برسی آج منائی جائے گی، تعزیتی جلسہ3 بجے دوپہر منعقد کیا جائے گا،پارٹی چیئرمین بلاول زرداری، آصف زرداری،وزیراعلیٰ سندھ مراد علی شاہ سمیت مختلف رہنما مستقبل کے سیاسی لائحہ عمل کا اعلان کریں گے۔برسی کی تقریب میں شرکت کے لیے کراچی سے پیپلزپارٹی کے قافلے گڑھی خدابخش کے لیے روانہ ہوگئے، صوبائی وزیراطلاعات ومحنت سعید غنی، وقارمہدی نے پیپلزسیکرٹریٹ سے قافلے کوگڑھی خدابخش کے لیے روانہ کیا۔بے نظیر بھٹو کی لاڑکانہ گڑھی خدابخش میں منائی جائے گی،بلاول و آصف زرداری اورپارٹی کے دیگر رہنما جلسے سے خطاب کریں گے۔ صوبائی وزیرسعید غنی کا کہنا ہے کہ کراچی سمیت ملک بھر کے تمام چھوٹے بڑے شہروں میں بھی زیر اہتمام مختلف تقریبات منعقد کی جائیں گی، جس سے پیپلزپارٹی کے رہنما خطاب کریں گے، تقریبات میں بے نظیر بھٹو کی ملک و قوم اور جمہوریت کے لیے پیش کی گئی قربانیوں کو خراج عقیدت پیش کیا جائے گا۔علاوہ ازیں برسی میں شرکت کے لیے پیپلزپارٹی آزاد کشمیرکے رہنماؤں کے علاوہ راجا پرویزاشرف اوردیگراہم شخصیات کراچی پہنچی ہیں جو گڑھی خدابخش کے لیے روانہ ہونگی۔
