چھٹے ایڈیشن کے فائنل میچ 3-3 گول سے برابر ہونے کے بعد جاپان کو پنالٹی شوٹ آئوٹس پر شکست، بھارت نے کانسی کا تمغہ جیت لیا۔
ڈھاکا: کوریا نے جاپان کو پینلٹی شوٹ آؤٹس پر شکست دیکر ایشین چیمپینز ٹرافی کا چھٹا ایڈیشن جیت لیا،مقررہ وقت تک میچ3-3گول سے برابر رہا جس پر میچ کا فیصلہ پینلٹی شوٹ آؤٹس پر ہوا۔ تیسری پوزیشن کے میچ میں بھارت نے سنسنی خیز مقابلے کے بعدپاکستان کو4-3سے شکست دیدی اور کانسی کا تمغہ جیت لیا، ٹورنامنٹ میں پاکستان چوتھے نمبر پر رہا۔ ایشین ہاکی فیڈریشن کے زیراہتمام بنگلا دیش ڈھاکا میں کھیلی جانے والی ایشین چیمپئنز ٹرافی کے اختتامی روز کوریا اور بھارت نے فتوحات حاصل کیں۔ ایونٹ کے تیسری ، چوتھی پوزیشن میچ میں بھارت نے پاکستان کو ایک سنسنی خیز اور اعصاب شکن مقابلے کے بعد بعد 3 کے مقابلے میں 4 گول سے شکست دے کر کر ایونٹ میں کانسی کا تمغہ حاصل کرلیا میچ کا آغاز تیز رفتار کھیل سے ہوا۔ روایتی حریفوں نے کانسی کے تمغے کی دوڑ کے اس میچ میں ایک دوسرے کو آڑے ہاتھوں لیا ۔ بھارت کو کھیل کے دوسرے منٹ میں یکے بعد دیگرے 4 پینلٹی کارنر ملے جس میں چوتھے پینلٹی کارنر پر بھارت کے فل بیک ہرمن پریت سنگھ نے تیز رفتار ڈریگ فلک کے ذریعے گول ا سکور کرکے اپنے ملک کو برتری دلائی۔ کھیل کے 10ویں منٹ میں پاکستان کی جانب سے افراز نے فیلڈ گول کے ذریعے گول ا سکور کر کے بھارت کی اس برتری کا خاتمہ کردیا اور ا سکور ایک، ایک گول سے برابر ہو گیا پاکستان کی جانب سے کھیل کے 33 ویں منٹ میں کھلاڑی رانا وحید نے نے پینلٹی کارنر پر گول ا سکورکر کے پاکستان کو ایک گول کی برتری دلادی۔ بھارت کی جانب سے ان کے کھلاڑی سْومت نیکھیل کے 45ویں منٹ میں فیلڈ گول کر کے اس برتری کا خاتمہ کیا اور ا سکور 2-2 گول سے برابر ہوگیا۔ بھارت کے کھلاڑی کمار وورون نے پینلٹی کارنر پر گول کر کے اپنی ٹیم کو برتری ایکبار پھر برتری دلادی۔ بھارت کی جانب سے آکاش دیپ سنگھ نے پینلٹی کارنر پرگول کر کے اس برتری کو مستحکم کیا اور ا سکور2-4 ہو گیا۔پاکستان کی جانب سے جوابی حملہ پر کھلاڑی عبداللہ کے بہترین پاس پر ا سٹرائیکر احمد ندیم نے گول کر کے ایک گول کے خسارے کو کم کر دیا۔ میچ کے اختتام تک اسکور 3-4 گول رہا۔ایشین چیمپینز ٹرافی کا فائنل کوریا اور جاپان کے درمیان کھیلا گیا جوکہ مقررہ وقت تک 3-3 گول سے برابر رہا۔ میچ کے اختتام پر پینلٹی شوٹ آؤٹس مرحلہ میں کوریا نے جاپان کو شکست دیکر ایشین چیمپینز ٹرافی کا چھٹا ایڈیشن اپنے نام کرلیا۔
