حکومت بجلی مہنگی کرکے بھی گردشی قرضے کم نہیں کرسکی ،شہباز شریف

لاہور(نمائندہ جسارت)مسلم لیگ (ن) کے صدر اور قائد حزب اختلاف شہباز شریف نے بجلی کی قیمت میں 4 روپے 33 پیسے فی یونٹ مزید اضافے کی درخواست واپس لینے کا مطالبہ کرتے ہوئے کہا ہے کہ ہر ماہ بجلی اور اشیائے ضروریہ کی قیمتوں میں اضافہ قوم کا معاشی استحصال اور قتل ہے ۔ ایک بیان میں انہوں نے کہا کہ بجلی کے ہر اضافے پر قوم کو یاد آجاتا ہے کہ بجلی کی قیمت بڑھانے والا وزیراعظم چور ہوتا ہے۔انہوں نے کہاکہ بجلی کی قیمت بھی بڑھتی جا رہی ہے لیکن پھر بھی گردشی قرض تاریخ کی بلند ترین سطح پر پہنچ چکا ہے۔انہوں نے کہاکہ حکومت بجلی کی قیمت بڑھا کر بھی گردشی قرض کم نہیں کرسکی۔ انہوں نے کہا کہ دعویٰ کیا گیا تھا کہ گردشی قرض ختم کردیں گے لیکن یہ قرض کم ہونے کے بجائے دگنا ہوچکا ہے ۔انہوں نے کہا کہ بجلی کی قیمتیں بڑھانا مسئلے کا حل نہیں، عوام اور معیشت کے مسائل مزید نہ بڑھائے جائیں ، قوم کو مزید تکلیف دینے کے بجائے حکومت مستعفی ہوجائے،یہ حکومت عوام کے لیے مستقل تکلیف بن چکی ہے۔