ڈھاکا(رپورٹ: وزیر علی قادری)پاکستان ہاکی ٹیم ایشین چیمپینز ٹرافی کے سیمی فائینل کے لئے کوالیفائی کرگئی، رابن راؤنڈ میچز کے آخری مرحلے میں پاکستان نے بنگلا دیش کو 2-6 گول سے شکست دیکر میگا ایونٹ کے سیمی فائینل میں جگہ بنالی۔
پاکستان کے کھلاڑی اعجاز احمد مین آف دی میچ قرار ہائے۔ بنگلا دیش کے شہر ڈھاکا میں ایشین چیمپینز ٹرافی کے چھٹے ایڈیشن میں پاکستان نے سیمی فائینلز میں جگہ بنا لی۔ رابن راؤنڈ میچز کے سلسلے میں آخری میچ میں پاکستان نے بنگلادیش کو 2-6 گول سے شکست دیکر پول پوزیشن بہتر بناتے ہوئے تیسری پوزیشن پر قدم جمادیئے۔
پوائنٹس ٹیبل پر بھارت 10 پوائنٹس کے ساتھ پہلی، کوریا 6 پوائنٹس کے ساتھ دوسری پاکستان 5 پوائنٹس اور بہتر گول اوسط کے ساتھ تیسری اور جاپان 5 پوائنٹس کے ساتھ چوتھی پوزیشن پر موجود ہے۔
پاکستان اور بنگلا دیش میچ میں بنگلا دیش نے پہل کرتے ہوئے میچ کے پہلے کوارٹر کے 13ویں منٹ میں ارشد حسین کی مدد سے فیلڈ گول ا سکور کرکے برتری حاصل کرلی۔کھیل کے 14ویں منٹ میں پاکستان کے احمد ندیم نے فیلڈ گول کے ذریعے گول اسکور کرکے بنگلا دیش کی برتری کا خاتمہ کردیا۔کھیل کے 18ویں منٹ میں پاکستان کی جانب سے اعجاز احمد نے فیلڈ گول کے ذریعے گول اسکور کرکے پاکستان کو برتری دلادی۔
کھیل کے 24ویں منٹ میں پاکستان کی جانب سے افراز نے ایک مرتبہ پھرفیلڈ گول اسکور کے اس برتری کو مستحکم بنایا۔کھیل کے 26ویں منٹ میں احمد ندیم نے پاکستان کی جانب چوتھا گول اسکور کیا۔
میچ کے 34ویں منٹ میں پاکستان کی جانب سے کھلاڑی سلمان رزاق نے پینلٹی کارنر کے ذریعے گول ا سکور کیا۔کھیل کے 35ویں منٹ میں بنگلا دیش نے کھلاڑی ارشد حسین کی مدد سے گول ا سکور کرکے گول خسارے کو کم کرنے کی کوشش کی جبکہ پاکستان کی جانب سے کھیل کے 38ویں منٹ میں پاکستانی اسٹرائیکر اعجاز احمد نے گول اسکور کرکے پاکستان کی سیمی فائینل تک رسائی پر فتح کی مہر ثبت کی اور مین آف میچ قرار پائے۔
پاکستان نے بہتر گول اوسط حاصل کرتے ہوئے ایونٹ میں پوائینٹس ٹیبل پر تیسری پوزیشن پر قدم جمالئے۔ایشین چیمپینز ٹرافی کے سیمی فائینلز ایک روز وقفے کے بعد کل کھیلے جائینگے۔ پاکستان سیمی فائینل میں کوریا کے مدمقابل پاکستانی وقت ڈھائی بجے دوپہر کھیلے گا جبکہ بھارت اور جاپان کے درمیان میچ5 بجے شام پاکستان وقت کے مطابق کھیلا جائیگا۔
