سکھر( نمائندہ جسارت)روہڑی کے قریب ریلوے پولیس کا ٹرک پر چھاپا ،لاکھوں روپے کا لوہا برآمد ،2 ملزمان گرفتار ،لوہا چوری کرکے لاہور لے جایا جارہا تھا ،ایس پی سکھر ریلوے پولیس امجد منظور نے روہڑی ریلوے تھانے پر پریس کانفرنس کرتے ہوئے بتایا ہے کہ ریلوے پولیس نے آئی جی ریلوے فیصل شاہکار کی ہدایت پر ریلوے کی تجاوزات کو واگزار کرانے اور املاک کو کسی بھی نقصان سے بچانے و چوری چھپانے کے لیے ایک خصوصی مہم شروع کر رکھی ہے جس دوران اطلاع ملی کہ ریلوے کا لاکھوں روپے کا مسروقہ لوہا و دیگر سامان چوری کرکے لے جانے کی کوشش کی جارہی ہے، جس پر ڈی ایس ریلوے سکھر کی مشاورت سے ریلوے پولیس کی 2 ٹیمیں تشکیل دی گئیں جنہوں نے روہڑی کے قریب موٹر وے پر ٹول پلازہ کے مقام پر ایک ٹرک کو روک کر اس سے لاکھوں روپے کا ریلوے کا لوہا جس میں ریلوے لائنوں کے ٹکڑے، فش پلیٹیں، بریک و دیگر سامان برآمد کرلیا اور ٹرک ڈرائیور رشید احمد اور کباڑی نسیم جاگیرانی کو گرفتار کرلیا گیا ہے ،جن کے خلاف مقدمہ درج کرکے تفتیش کی جارہی ہے۔
