کراچی (اسٹاف رپورٹر)یوم جناح آل کراچی انٹر ڈسٹرکٹ ہاکی ٹورنامنٹ میں کیماڑی اور ڈسٹرکٹ سینٹرل کا میچ 2-2 گول کے برابر رہا جبکہ دوسرے میچ میں ڈسٹرکٹ ایسٹ نے نعمان خانزادہ کی ہیٹ ٹرک کی مدد سے کورنگی کو 4-2 سے شکست دیدی۔ کراچی ہاکی ایسوسی ایشن کے زیر انتظام کے ایچ اے اسپورٹس کمپلیکس گلشن اقبال میں بھٹائی رینجرز سندھ 72 ونگ کے اشتراک اور ٹاپ سٹی ون کے تعاون سے یوم جناح آل کراچی ٹاپ سٹی ون انٹر ڈسٹرکٹ ہاکی ٹورنامنٹ کے دلچسپ اور سنسنی خیزمقابلے کے چوتھے روز ڈسٹرکٹ کیماڑی اور ڈسٹرکٹ سینٹرل کے درمیان کھیلا گیا۔ میچ 2-2 گول سے برابر رہا، ہرلمحہ رنگ بدلتے عصاب شکن میچ میں کیماڑی ڈسٹرکٹ کو پہلے ہاف کے اختتام پر 25 ویں منٹ میں منور کے گول کے باعث1-0 کی برتری حاصل تھی، دوسرے ہاف میں ڈسٹرکٹ سینٹرل نے بہترین کھیل کا مظاہرہ کرتے ہوئے 47 ویں منٹ میں نعمان خان کے گول کی مدد سے مقابلہ برابر کردیا تاہم اگلے منٹ میں ڈسٹرکٹ کیماڑی کے علیان نے گول کرکے اپنی ٹیم کو ایک مرتبہ پھر 2-1سے برتری دلادی، کھیل کے اخری لمحات میں ڈسٹرکٹ سینٹرل ارسلان حیدر نے گیند جال میں پھینک کر مقابلہ 2-2 گول سے برابر کردیا، بہترین کھیل کے باعث ڈسٹرکٹ کیماڑی کے علیان کو 5ہزار روپے نقد مین اف دی میچ ایوارڈ کا حقدار قرار دیا گیا۔ دوسرے میچ میں ڈسٹرکٹ ایسٹ نے ڈسٹرکٹ کورنگی کو4-2 سے زیر کرلیا، پہلے ہاف کے اختتام پر ڈسٹرکٹ ایسٹ کو 2-3 کی برتری حاصل تھی تاہم دوسرے ہاف میں فاتح ٹیم نے مزید ایک گول کرکے مقابلہ 4-2 سے اپنے نام کرلیا۔ فاتح ٹیم کے نعمان خانزادہ نے11ویں،20ویںاور 23ویں منٹ میں گول کرکے ہیٹرک کا اعزاز حاصل کیا، دانیال رشید نے 34 ویں منٹ میں گول کرکے فاتح ٹیم کی برتری مستحکم کردی، ڈسٹرکٹ کورنگی کے میسم عباس نے 14 ویں اور 28 ویں منٹ میں گول کرکے خسارہ کم کرنے کی کوشش کی،شاندار ہیٹ ٹرک کے باعث فاتح ٹیم کے نعمان خانزادہ مین اف دی میچ5 ہزار روپے نقد ایوارڈ کے حقدار قرار پائے۔
