یونیورسٹی آف تربت کی فیکلٹی آف سائنس اینڈ انجینئرنگ کے ڈین ڈاکٹرنعیم اللہ اور شعبہ نیچرل اینڈبیسک سائنس کے چیئرمین ڈاکٹرروح اللہ کو ترکی کی یونیورسٹیوں اور تحقیقی اداروں میں وزیٹنگ سائنسدان کے طورپرخدمات سرانجام دینے کے لئے منتخب کیاگیاہے،
دونوں فیکلٹی ممبران ترکی میں اکیڈمک پیریڈ 2022-23کے دوران تعلیمی اور ریسرچ اینڈ ڈویلپمنٹ(R&D) سرگرمیوں میں حصہ لیں گے۔ ڈاکٹرنعیم اللہ اور شعبہ نیچرل اینڈبیسک سائنس کے چیئرمین ڈاکٹرروح اللہ ترکی کے میزبان سائنسدان پروفیسرڈاکٹرمصطفی طوزین کے ساتھ مل کردو الگ الگ مشترکہ تحقیقاتی پروجیکٹس پرکام کریں گے۔ترکی کا تحقیقاتی ادارہ ترکش سائنٹیفک اینڈٹیکنالوجیکل ریسرچ کونسل وزیٹنگ سائنٹسٹ فیلوشپ پروگرام کے تحت ان مشترکہ تحقیقاتی پروجیکٹس کوا سپانسرکرے گا۔یونیورسٹی ترکی میں بطوروزٹنگ سائنٹسٹ منتخب ہونے پرڈاکٹرنعیم اللہ اور ڈاکٹرروح اللہ کومبارکباددیتے ہوئے یونیورسٹی آف تربت کے وائس چانسلرپروفیسرڈاکٹر جان محمد نے اس کامیابی کو اپنے ادارے کے لئے ایک اعزازقراردیا ہے۔
