اسلام آباد (جسارت نیوز)ایبٹآباد ڈس ایبلڈ نے راولپنڈی ڈس ایبلڈ کو شکست دے کر آئی سی آر سی پریذنٹس ایس اے ایف 7ویں قومی ڈس ایبلڈ ٹی 20 کرکٹ چمپئن شپ کے کوارٹر فائنل کے لیے کوالیفائی کر لیا،کوارٹر فائنل میں اس کا مقابلہ آج اسلام آباد ڈس ایبلڈ سے ہوگا۔ پاکستان فزیبلٹی ڈس ایبلڈ کرکٹ ایسوسی ایشن کے زیر انتظام جاری نیشنل چمپئن شپ کے چوتھے مرحلے کے سلسلے میں گزشتہ روز کھیلے گئے میچ میں ایبٹ آباد ڈس ایبلڈ نے راولپنڈی ڈس ایبلڈ کو3 وکٹوں سے شکست دے کر ٹاپ ایٹ میں جگہ بنائی۔ راولپنڈی ڈس ایبلڈ نے پہلے کھیلتے ہوئے 5 وکٹوں پر164 رنز اسکور کیے۔ اس کی جانب سے محمد ارسلان نے 62گیندوں پر 14چوکوں اور ایک چھکے کی مدد سے87رنز بنائے جبکہ بلال عظیم نے13رنز اسکور کیے۔ ایبٹ آباد ڈس ایبلڈ کی جانب سے محمد حسین نے 27رنز دے کر 3 وکٹیں لیں ،جواب میں ایبٹ آباد نے 7 وکٹوں پر ہدف حاصل کر لیا ،اس کی جانب سے عبدالسلام نے 37گیندوں پرسات چھکوں اور 6 چوکوں کی مدد سے81 رنز اسکورکیے ۔ عبدالسلام مین آف دی میچ قرار دیے گئے۔ دوسرے میچ میں راولپنڈی ڈس ایبلڈ پہلے کھیلتے ہوئے 110رنز پرآئوٹ ہو گئی اس کی جانب سے وجاہت دبیر نے27اور کاشف جاوید نے14رنز بنائے۔ ایبٹ آباد کی جانب سے پذیر محمد نے 11اور راج ولی نے 24رنز دے کر 3,3جبکہ محمد حسین نے 2 کھلاڑی آئوٹ کیے۔ جواب میں ایبٹ آباد ڈس ایبلڈ نے 10اوورز میں 2 وکٹوں کے نقصان پر مطلوبہ اسکور بنا لیا ،فواد یونس نے 27 گیندوں پر 7 چوکوں اور 2 چھکوں کی مدد سے 50جبکہ فیصل حیات نے 16گیندوں پر 2چوکوں اور 4 چھکوں کی مدد سے 35رنز بنائے۔
