جونیئر عالمی ہاکی کپ ‘پاکستانی ٹیم بھارت پہنچ گئی

دہلی(نمائندہ خصوصی) قومی ہاکی ٹیم جونیئر عالمی کپ میں شرکت کے لیے بھارت پہنچ گئی۔ دہلی میں پاکستان ہائی کمشنر آفتاب حسن نے استقبال کیا‘ٹیم کے اعزازمیں ظہرانے کااہتمام کیا گیا۔ جونیئر ہاکی ورلڈ کپ 24 نومبر سے 5 دسمبر بھوبنیشور، اڑیسہ میں منعقد
ہوگا۔ اس موقع پر پاکستانی ہائی کمشنر آفتاب حسن نے ہاکی ورلڈ کپ میں پاکستان کی ٹیم کی کامیابی کیلیے نیک خواہشات کا اظہار کیا۔انہوں نے کہاکہ ہاکی پاکستان کا قومی کھیل ہے، امید ہے کہ تمام کھلاڑی اپنی بھرپور صلاحیتوں کو بروئے کار لاتے ہوئے قومی جذبے کے ساتھ بہترین کارکردگی کا مظاہرہ کریں گے۔ قبل ازیں اندرا گاندھی انٹرنیشنل ایئر پورٹ، نئی دہلی پر پاکستان مینز جونیئر ہاکی ٹیم کے ارکان کا ہائی کمیشن کے سینئر سفارت کار نے استقبال کیا۔ ہیڈ کوچ، ٹیم انتظامیہ اور کھلاڑیوں نے بھوبنیشور جاتے ہوئے دہلی میں اپنے قیام کے دوران پاکستان ہائی کمیشن کی مہمان نوازی کو سراہا۔پاکستان ہاکی ٹیم میچوں میں بہتر کارکردگی کا مظاہرہ کرنے کے لئے پوری طرح تیار ہے۔ پاکستان جونیئر ہاکی ٹیم دہلی سے بھوبنیشور پہنچ گئی۔ قومی ہاکی اسکواڈ کا منتظمین نے اڑیسہ ایئرپورٹ پر استقبال کیا۔