ڈس ایبلڈ قومی ٹی ٹوئنٹی،ملتان کوارٹر فائنل میں داخل

ملتان (جسارت نیوز) ملتان نے سرگودھا کو دونوں میچز میں شکست دے کر آئی سی آر سی پریذنٹس ایس اے ایف ساتویں فزیکلی ڈس ایبلڈنیشنل ٹی20کرکٹ چمپئن شپ کے کوارٹر فائنل میں جگہ بنالی ،فاتح ٹیم کے غلام محمد نے تیز ترین سنچری اسکور کر کے ڈس ایبلڈ کرکٹ کا نیا ریکارڈ بنا ڈالا انہوں نے 27گیندوں پر سنچری بنائی جبکہ مطلوب قریشی نے بھی شاندار سنچری اسکور کی۔ دوسرے مرحلے کے سلسلے میں آج ایم سی سی گرائونڈ ملتان پر بہاولپور کا مقابلہ فیصل آباد سے ہوگا۔ پاکستان فزیکلی ڈس ایبلٹی کرکٹ ایسوسی ایشن کے زیر انتظام جاری نیشنل چمپئن شپ کے دوسرے مرحلے میں جمعہ کو کھیلے گئے پہلے میچ میں دفاعی چمپئن ملتان نے پہلے کھیلتے ہوئے 20اوورز میں ایک وکٹ کے نقصان پر 249رنز کا پہاڑ جیسا اسکور بنا ڈالا ،اس کی جانب سے مطلوب قریشی نے 64 گیندوں پر11چوکوں کی مدد سے ناقابل شکست 101 رنز اسکور کیے جبکہ زمان علی نے 37گیندوں پر75اور جہانزیب ٹوانہ نے 18گیندوں پر45رنز بنائے۔ سرگودھا ڈس ایبلڈ کی جانب سے خاور نے واحد وکٹ حاصل کی۔ جواب میں سرگودھا کی ٹیم 19اوورز میں 79رنز پر ڈھیر ہو گئی۔ احسن خلیل نے21رنز اسکور کیے۔ ملتان ڈس ایبلڈ کی جانب سے ایم طارق نے 10رنز کے عوض 3 جبکہ زبیر سلیم اور محمد آصف نے دو دو کھلاڑیوں کو آئوٹ کیا۔