اسلام آباد: وفاقی دارالحکومت کے غیر فعال میٹرو اسٹیشن کے واش روم سے ملنے والی بچی کے اندھے قتل کا مقدمہ درج کرلیا گیا ہے۔
تفصیلات کے مطابق مقدمہ نامعلوم ملزمان کیخلاف تھانہ رمنا میں درج کیا گیا ہے، گیارہ سالہ بچی کی لاش تاحال پمز اسپتال میں موجود ہے۔
تھانہ پولیس رمنا کا کہنا ہے کہ مقتولہ کی پوسٹ مارٹم رپورٹ کے بعد دیگر دفعات شامل کی جائینگی، اس حوالے سے ایس ایس پی انویسٹی گیشن کی سربراہی میں ٹیم بنائی جاچک ہے، ٹیم واقعے کے حوالے سے تحقیقات میں مصروف ہے۔
پولیس نے میٹرو اسٹیشن کے دو سیکیورٹی گارڈز کو حراست میں لے لیاہے۔ دوسری جانب جی الیون میٹرواسٹیشن سے 11سالہ بچی کی لاش ملنے کے واقعے پر پمز اسپتال کے 3رکنی میڈیکل بورڈ نے پوسٹ مارٹم مکمل کرلیا ہے۔
ذرائع نے بتایا کہ پوسٹ مارٹم میں بچی سیزیادتی ثابت ہوئی ہے، بچی کی موت دم گھٹنے سے ہوئی ،جسم پر زخم، خراشیں ہیں، جس کے بعد پمز اسپتال کے میڈیکل بورڈ کا بچی کا فرانزک ٹیسٹ کرانے کا فیصلہ کیا ہے، سیمپلز پنجاب سائنس فرانزک ایجنسی بھجوائے جائیں گے۔
واضح رہے کہ اسلام آباد کے تھانہ رمنا کے علاقے میں جی الیون میٹرو اسٹیشن کے غیر فعال واش روم سے گیارہ سالہ بچی کی لاش برآمد ہوئی تھی، پولیس کے مطابق بچی کو گلا دبا کر قتل کیا گیا تھا۔
