لاڑکانہ (نمائندہ جسارت) گھوٹکی، سکھر اور اوستا محمد اضلاع کے مختلف علاقوں مختلف حادثات اور واقعات میں 3 افراد جاں بحق ہوگئے۔ تفصیلات کے مطابق گھوٹکی ضلع کے شہر خان پور مہر کے قریب گاؤں کشمیر گڈانی کا رہائشی 17 سالہ 8 ویں جماعت کا طالبعلم مختار گڈانی تیز رفتاری کے باعث موٹرسائیکل سے گر کر شدید زخمی ہوگیا جسے فوری طبی امداد کیلیے اسپتال لے جایا گیا جہاں وہ دوران علاج دم توڑگیا۔ سکھر کے قریب صالح پٹ کے نواحی گاؤں مٹھو مہر میں پلاٹ کے تنازع پر مبینہ طور پر کلہاڑیوں کے وار سے ضعیف شخص حضور بخش مہر شدید زخمی ہوگیا جسے ورثا نے تشویش ناک حالت میں چانڈکا اسپتال منتقل کیا جہاں وہ جانبر نہ ہوسکا۔ بلوچستان کے شہر اوستا محمد میں گھر کے اندر مبینہ طور پر ریوالور کی گولی لگنے سے 18 سالہ نوجوان دھنی بخش عمرانی شدید زخمی ہوگیا، جسے ورثا کی جانب سے تشویش ناک حالت میں چانڈکا اسپتال کے شعبہ حادثات منتقل کیا گیا جہاں دوران علاج نوجوان دم توڑگیا۔ دوسری جانب تینوں متوفین کی لاشیں ورثا کے حوالے کردی گئیں، نعشوں کو بذریعہ ایمبولینس آبائی گاؤں پہنچایا گیا، لاشیں گھر پہنچنے پر کہرام مچ گیا۔
