اسلام آباد ( آن لائن) اسپیکر قومی اسمبلی اسد قیصر نے کہا ہے کہ پاکستان کرغستان کے ساتھ اپنے برادرانہ تعلقات کو بڑی اہمیت دیتا ہے۔ پاکستان اور کرغستان مذہب، اخوت اور ثقافت کے لازوال رشتوں میں بندھے ہوئے ہیں۔ ان خیالات کا اظہار انہوں نے کرغستان کے سفیر سے بات چیت کے دوران کیا۔ ملاقات میں دوطرفہ تعلقات، اہم علاقائی و عالمی امور سمیت
باہمی دلچسپی کے دیگر امور پر تبادلہ خیال کیا گیا۔ اسد قیصر نے کہا کہ پاکستان کرغستان کے ساتھ اپنے برادرانہ تعلقات کو بڑی اہمیت دیتا ہے۔ انہوں نے کہا کہ پاکستان کرغستان کے ساتھ پارلیمانی اور اقتصادی رابطوں کو فروغ دے کر دوطرفہ تعلقات کو مزید وسعت دینے خواہشمند ہے۔ انہوں نے کہا کہ دونوں ممالک کے پارلیمانوں میں رابطوں کا فروغ دوطرفہ تعلقات کو مزید مستحکم بنانے میں اہم کردار ادا کرے گا۔ اس موقع پر سفیر کرغستان نے کہا کہ پاکستان کے ساتھ برادرانہ، دوستانہ تعلقات مزید مضبوط ہو رہے ہیں۔ دوستانہ تعلقات کو قدر کی نگاہ سے دیکھتے ہیں۔ دونوں ممالک کے اراکین پارلیمنٹ دونوں اقوام کو قریب لانے میں اہم کردار ادا کر سکتے ہیں۔
