اسلام آباد(خبر ایجنسیاں)رواں برس جنوری میں رشتہ ازدواج میں بندھنے والی سابق وزیر اعظم بینظیر بھٹو اور سابق صدر آصف علی زرداری کی بڑی صاحبزادی بختاور زرداری کے ہاں بچے کی پیدائش ہوگئی۔بختاور زرداری نے اپنی ٹوئٹ میں تصدیق کی کہ ان کے ہاں 10 اکتوبر کو بیٹے کی پیدائش ہوئی۔آصف علی زرداری کی صاحبزادی 31جنوری2021کو پاکستانی نژاد دبئی کے صنعت کار محمود چودھری کے ساتھ رشتہ ازدواج میں منسلک ہوئی تھیں۔بختاور نے ٹوئٹ کرتے ہوئے اللہ کا شکر ادا کیا۔اس خوشخبری کے ساتھ ہی سابق صدر آصف زرداری نانا اور بلاول زرداری ماموں بن گئے ہیں جبکہ ٓصفہ زرداری خالہ بن گئی ہیں۔پاکستان پیپلزپارٹی کے چیئرمین بلاول زرداری نے بختاور کے ٹوئٹ پر کہا کہ باقاعدہ ماموں بن گیا۔ آصفہ بھٹو زرداری نے بھی ٹوئٹ کرتے ہوئے کہاکہ باقاعدہ خالہ بن گئی اور اس پر اللہ کے شکر گزار ہیں۔
