لاہور(نمائندہ خصوصی)پاکستان ہاکی فیڈریشن نے جونیئرہاکی ورلڈکپ کی تیاری کے لیے 29 کھلاڑیوں پر مشتمل تربیتی کیمپ کا اعلان کردیا، کیمپ کمانڈنٹ و ہیڈ کوچ قومی جونیئر ہاکی ٹیم اولمپین دانش کلیم کی زیرنگرانی تربیتی کیمپ 14 اکتوبر سے عبدالستار ایدھی ہاکی اسٹیڈیم کراچی میں منعقد ہوگا۔ بھارت کے شہر بھوبنیشور میں 24 نومبر تا 5 دسمبر منعقد ہونے والے جونیئر ہاکی ورلڈ کپ میں شرکت کرنے والی قومی ہاکی ٹیم کی تیاری کے لیے پاکستان ہاکی فیڈریشن کی جانب سے 29 رکنی قومی جونیئر تربیتی ہاکی کیمپ کا اعلان کردیا گیا۔ پاکستان ہاکی فیڈریشن کے زیراہتمام عبدالستار ایدھی ہاکی اسٹیڈیم کراچی میں کیمپ کا آغاز 14 اکتوبر کو ہوگا۔ کھلاڑیوں کو ہدایات جاری کی گئی ہیں کہ وہ وقت مقررہ پر ہیڈ کوچ قومی جونیئر ہاکی ٹیم و کیمپ کمانڈنٹ اولمپین دانش کلیم کو رپورٹ کرینگے۔ کھلاڑیوں میں رانا وحید(واپڈا)، معین شکیل (واپڈا)، غضنفر علی (ماڑی پیٹرولیم)، وقار (گول کیپر،واپڈا)، عمیر ستار (ماڑی پیٹرولیم)، عقیل احمد (ماڑی پیٹرولیم)، عبداللہ اشتیاق ودیگر شامل ہیں۔
