کراچی (اسٹاف رپورٹر)گورنر سندھ عمران اسماعیل نے کہا ہے کہ پاکستان میں ٹیلنٹ کی کوئی کمی نہیں، پوری دنیا پاکستانی کرکٹرز کے ٹیلنٹ کو تسلیم کرتی ہے، انہوں نے مزید کہا کہ کھلاڑی ملک کے نمائندے و سفیر ہوتے ہیں۔ ان خیالات کا اظہار انہوں نے چیئرمین پاکستان کرکٹ بورڈ رمیز راجا سے گورنر ہاؤس میں ملاقات کے دوران کیا۔ ملاقات میں ڈومیسٹک اور انٹرنیشنل کرکٹ کے امور سمیت ملک میں کرکٹ کی بہتری ، لیگ کرکٹ کے فروغ کیلیے اقدامات پر تبادلہ خیال کیا گیا۔ ملاقات میں سندھ میں کرکٹ کے ٹیلنٹ کو سامنے لانے اور کرکٹ کے فروغ کیلیے مشترکہ اقدامات پر بھی اتفاق کیا گیا۔ گورنر سندھ نے کہا کہ صوبہ سندھ میں ٹیلنٹ ہنٹ کیمپ کا انعقاد کیا جائے۔ گورنر سندھ نے مزید کہا کہ پوری قوم کی نظریں آپ پر ہیں اور وہ پاکستان کی کرکٹ ٹیم کو ہر میدان میں کامیاب دیکھنا چاہتی ہے۔ چیئرمین پاکستان کرکٹ بورڈ رمیز راجا نے کہا کہ وزیر اعظم عمران خان کے اعتماد اور پاکستانی عوام کو مایوس نہیں کروں گا۔
