سکھر میں ریل کی پٹری سمیت دیگر مسروقہ سامان پکڑا گیا

سکھر(نمائندہ جسارت)روہڑی ریلوے پولیس نے سکھر میں ایک کباڑی کی دکان پر چھاپا مار کر ریل کی پٹریاں اور ریلوے کا دیگر چوری شدہ قیمتی سامان برآمد کرلیا۔ریلوے تھانہ روہڑی کے ایس ایچ او الطاف حسین کے مطابق ایک مقدمے کی تفتیش جاری تھی کہ ریلوے پولیس افسر امیر علی شاہ کو ملنے والی اطلاع پر روہڑی بائی پاس کے قریب کباڑ کی دکان پر چھاپا مارا گیا۔ ایس ایچ او الطاف حسین کے مطابق چھاپے کے وقت وہاں ایک ٹرک میں لوہے کا سامان لوڈ ہو رہا تھا، جس میں ریلوے کا سامان بھی شامل تھا۔موقع پر موجود ملزم کو گرفتار کرلیا گیا اور ٹرک کو بھی قبضے میں لے لیا گیا، تلاشی کے دوران ٹرک سے ریلوے لائن کے مختلف سائز کے 22 ٹکڑے، 120 ٹی بلٹ، 40 پِن، 74 لوہے کی کیل، 28 چابی، 7 پلیٹ جوڑ، 5 پلیٹ کِٹ، 27 انکر پلیٹ، 6 فش پلیٹ، 5 ٹی بار ،11 بیئرنگ پلیٹ، 3 انکر ڈبل، 1 اسٹیل سلیپر، 1 سی ایس ٹی سلیپر، 3 اسکرو پن کپلین، 9 بریکٹ، 2 فلوٹنگ لیور، 50 بریک شو 40 بریک بلاک اور دیگر ریلوے مٹیریل برآمد ہوا۔پولیس کے مطابق ریلوے کا یہ سامان نامعلوم مقام سے چوری کر کے فروخت کیا گیا تھا، ایک ملزم گرفتار ہے جب کہ دو ملزمان ٹرک ڈرائیور عبد الرحمان اور دکاندار عابد حسین قریشی فرار ہیں۔