کراچی (اسٹاف رپورٹر)پاکستان پیپلزپارٹی کے چیئرمین بلاول زرداری نے کنٹونمنٹ بورڈز کے انتخابات جیتنے والے پی پی پی امیدواروں کو مبارک باددیتے ہوئے کہاہے کہ انتخابات جیتنے والے پی پی پی کے حمایت یافتہ آزاد امیدواران کو بھی کامیابی مبارک ہو۔ان کا کہنا ہے کہ صدر مملکت اور گورنر سندھ کے انتخابی حلقے کلفٹن کنٹونمنٹ میں پی پی پی کی جیت سے 2018 ء کے عام انتخابات میں دھاندلی کے تمام خدشات درست ثابت ہوئے ہیں۔ بلاول زرداری نے کہاکہ پشاور کے کنٹونمنٹ بورڈز میں ماضی کی ایک نشست کے مقابلے میں پی پی پی کو دو نشستوں پر کامیابی ملی،پی ٹی آئی کے گڑھ کہلائے جانے والے پشاور کنٹونمنٹ میں جو نشستیں دوسری سیاسی جماعتوں نے جیتیں، وہاں بھی جیالے امیدوار رنر اپ رہے،ایبٹ آباد کنٹونمنٹ تک سے جیالے امیدوار کی کامیابی ملک میں بھٹوازم کی مقبولیت کا منہ بولتا ثبوت ہے،لاہور، اوکاڑہ، کوہاٹ اور پنوعاقل کنٹونمنٹ کے انتخابات کی مخصوص نشستوں پر حریف امیدواروں کو کم ووٹوں کی برتری سے جتوائے جانے پر تحفظات ہیں۔پیپلزپارٹی کو کراچی کے کنٹونمنٹ انتخابات میں تمام سیاسی جماعتوں کے مقابلے میں سب سے زیادہ ووٹ ملے،پی ٹی آئی کے ہوم گراؤنڈ کہلانے والے کلفٹن کنٹونمنٹ سے پاکستان پیپلزپارٹی کو سب سے زیادہ ووٹ ملے۔
