اسلام آباد(جسارت نیوز)پاکستان اور نیوزی لینڈ کی کرکٹ ٹیموں کے درمیان 3 ون ڈے میچوں کی سیریز کا پہلا میچ 17 ستمبر کو راولپنڈی اسٹیڈیم میں کھیلا جائے گا، مہمان ٹیم ون ڈے سیریز کے تینوں میچز راولپنڈی میں کھیلے گی۔نیوزی لینڈ کرکٹ ٹیم کے 18 سال بعد پاکستان کا دورہ کر رہی ہے۔ نیوزی لینڈ کرکٹ ٹیم 3 ون ڈے اور5ٹی ٹوئنٹی انٹرنیشنل میچز پر مشتمل سیریز کھیلنے کے لئے اسلام آباد پہنچے گی۔مہمان ٹیم کے پاکستان پہنچنے پر ان کی حفاظت کے لئے فل پروف سکیورٹی کے انتظامات کیے گئے ہیں۔ پاکستان اور نیوزی لینڈ کے مابین کرکٹ سیریز 17 ستمبر سے 3 اکتوبر تک جاری رہے گی۔ پاکستانی شائقین کرکٹ مہمان ٹیم کے پاکستان آنے پر بہت خوش ہیں۔ شائقین کا کہنا ہے کہ 18 سال قبل نیوزی لینڈ کرکٹ ٹیم کو آخری مرتبہ پاکستان میں کھیلتے ہوئے دیکھا تھا، خوشی ہے کہ طویل عرصے بعد دونوں ٹیموں کا حوصلہ بڑھانے کے لیے اسٹیڈیم جائیں گے ۔ گوجرانوالہ سے تعلق رکھنے والے کرکٹ کے مداح میاں کبیر احمد نے کہا کہ اس تاریخی سیریز کے آغاز کا شدت سے منتظر ہوں۔ دل کی گہرائیوں سے قومی ٹیم کو سپورٹ کر رہا ہوں۔ انہوں نے کہا کہ پانچوں ٹی ٹوئنٹی انٹرنیشنل میچ دیکھنے کے لئے قذافی اسٹیڈیم لاہور جائیں گے۔ انہوں نے کہا کہ نیوزی لینڈ کرکٹ ٹیم کو 18 سال بعد پاکستان کا دورہ کرنے پر مبارکباد پیش کرتے ہیں۔
